Hótanir Utanríkisráðherra Hollands og vanþekking hans á ESB tilskipunum

Það þarf varla að koma nokkrum á óvart að okkur sé hótað töf á inngöngu í ESB á meðan við samþykkjum ekki ábyrgð ríkisins á Icesave samningum. Þrátt fyrir að vera ekki mikill ESB aðildarsinni, eins og staðan er í dag (kannski seinna, eða ekki?), er ég farin að hugsa sem svo að umsókn um aðild hafi ekki verið svo slæm á þessu stigi. Hún mun kannski gera þær hótanir sem átt hafa sér stað enn sýnilegri. 

Hjá ESB þarf samhljóða samþykki allra aðildarríkja til að samþykkja aðild nýrra ríkja. Þannig getur jafnvel eitt ríki af 27 synjað nýju ríki um aðild og komið í veg fyrir hana. Þvingunaraðgerðir Hollendinga og Breta eru því dæmdar til að heppnast og munu örugglega bera árangur gagnvart þeim sem vilja tafarlausa aðild Íslands að ESB. Þrátt fyrir að ýmsir stjórnmálamenn þvertaki fyrir að þessi tvö málefni séu tengd (ESB aðild og Icesave) og að þeir séu að "þrýsta" frumvarpi um Icesavesamninga í gegn um alþingi, á mettíma til að komast í ESB, ætti flestum að vera orðið ljóst að þessi tvö málefni eru tengd! Aðilar sem eru fyrir okkar hönd reiðubúnir að greiða þann fórnarkostnað sem ríkisábyrgð á Icesave samningum felur í sér, fyrir ESB aðild, eru ekki hæfir til að sitja á alþingi!

Það er athyglisvert að Utanríkisráðherra Hollands segir að samþykki muni flýta fyrir aðild Íslands að ESB og sýna fram á að Íslendingar taki tilskipanir frá ESB alvarlega. Í þessari fullyrðingu felst bæði hótun og vanþekking! Hótunina þekkjum við en vanþekkingin er ekki síður alvarleg, sér í lagi í ljósi stöðu hans. Við Íslendingar, líkt og aðrar þjóðir ESB, höfum innleitt allar tilskipanir frá ESB er varða fjármálastarfsemi því við erum aðilar að EES samningnum. Fjármálaeftirlitið sá síðan til þess að þeim væri fylgt. Þessar reglur voru hins vegar verulega gallaðar og eru tryggingarsjóðir um alla Evrópu verulega undirfjármagnaðir, ekki bara á Íslandi. Það er ekkert í neinum tilskipunum ESB sem kveður á um ríkisábyrgð á innistæðum, við hrun fjármálastofnana, ef innistæður tryggingasjóða (sem eru fjármagnaðir af fjármálastofnunum) duga ekki fyrir innistæðum.  Þessir sjóðir eru álitnir sjálfstæðar stofnanir (skv ESB tilskipunum), án ríkisábyrgðar, til að koma í veg fyrir brot á samkeppnislögum. Ef eitt tiltekið ríki myndi gefa út ríkisábyrgð myndi það veita þarlendum skráðum fjármálastofnunum samkeppnisforskot... sem telst lögbrot. Þetta er viðurkennd staðreynd!

Endurskoðun á lögum um fjármálastarfsemi og tryggingarsjóði hefur staðið til í mörg ár hjá ESB þar sem aðilar vissu um galla í regluverkinu en henni var aldrei hrint í framkvæmd. Í dag er slík endurskoðun í gangi og eru hugmyndir á lofti um að gera tryggingarsjóði meira sameiginlega fyrir allt svæðið, þ.e. sameiginleg ábyrgð allra ríkja.

Varðandi ábyrgð íslenskra skattgreiðenda á að greiða innistæður Breta og Hollendinga: Við skulum ekki gleyma því að hollenskir og breskir innistæðueigendur hafa greitt fjármagnstekjuskatt af sínum innistæðum til breska og hollenska ríkisins undanfarin ár en ekki hins íslenska!

Þrýst á Íslendinga

Athugasemdir

[Vilhjálmur Árnason, 22.7.2009 kl. 02:26]

Það er hressandi að sjá færslur þínar.

Rökfastar og fletta ofan af þessu bulli sem flæðir yfir allt. Velkomin í hópinn sem dregur í efa málflutning SF og þeirra sem telja ESB lausn á öllum vanda.

Glögg ábending varðandi ríkisábyrgðir á innistæðum. Good luck.

[Sævar Finnbogason, 22.7.2009 kl. 04:41]

Þetta er nefnilega mikilvægur punktur.

Við skulum ekki gleyma því að hollenskir og breskir innistæðueigendur hafa greitt fjármagnstekjuskatt af sínum innistæðum til breska og hollenska ríkisins undanfarin ár en ekki hins íslenska! 

Það er á þessum forsendum sem við getum ætlast til þess að þessar þjóðir komi verulega til móts við okkur þó manni sýnist ekki vikist undan siðferðilegri ábyrgð Íslands í þessu máli öllu.

Það var vegna þessa meðal annars að Brussel viðmiðin voru samþykkt í nóvember í fyrra fyrir tilstuðlan í samningum milli Íslands, Bretlands og Hollands með aðkomu ESB. Þar var ákveðið að tekið skildi fullt tillit til þeirra óvenjulegu og fortakslausu aðstæðna sem ríktu á Íslandi. Svo sendum við samninganefnd frá fjármálaráðuneytinu út að vaða í að semja á þeim grunni og hún virðist ekki gera kröfu um að ESB komi að samningagerðinni eða nýtir sér almennilega pólitískar leiðir af neinu viti. Nefndin kemur svo heim með samning sem er ekki í samræmi við Bussel viðmiðin og minnist ekki á þau einu orði.

[Sævar Finnbogason, 22.7.2009 kl. 04:42]

 

[Sigga (IP-tala skráð) 22.7.2009 kl. 08:49]

Fróðlegt að lesa þetta..

[Sævar Einarsson, 22.7.2009 kl. 09:54]

Takk fyrir frábærlega vel skrifaða grein.

[Sævar Einarsson, 22.7.2009 kl. 11:33]

Það er ekki nema von að Bretar og Hollendingar vilji ekki að þetta verði sent til dómstóla því þar tapa þeir þessu og það vita þeir.

[Kolbrún Heiða Valbergsdóttir, 22.7.2009 kl. 16:02]

Takk fyrir fróðlegan pistil